DÍA DAS LETRAS GALEGAS

Carvalho Calero

Trinta anos despois do seu pasamento, este 17 de maio celebramos a vida e obra de Ricardo Carvalho Calero (Ferrol, 1910- Compostela 1990). Membro da Xeración do Seminario de Estudos Galegos, Carvalho Calero foi un dos redactores do Estatuto de Autonomía da II República. Despois de loitar no bando republicano durante a Guerra Civil exerceu a docencia en Ferrol, colaborou na fundación da editorial Galaxia e publicou a primeira novela en galego da posguerra (A xente da Barreira) e varios poemarios. Foi catedrático de lingua e literatura galegas na Universidade de Santiago, membro da Real Academia Galega e autor dunha gramática galega de grande difusión e dunha enciclopédica historia da literatura galega. Na súa etapa de madurez, defendeu a aproximación ortográfica entre o galego e o portugués, que consideraba variantes da mesma lingua.